ꆀꃅꈎꏅꑟꇁꌦꀐ

ꁱꊿ：ꐚꅪꉙꌒ

ꀘꊿ：ꐛꈩꒉꎄ

ꈎꎂꈎꈴꁧ，ꆪꎂꆪꈴꁧ，ꌭꂿꌭꀋꉆ，ꄡꂿꄡꀋꉆ；ꈧꇁꆪꌺꑌ，ꆏꁧꉢꇁꃅ，ꃅꑍꃅꉖꑌ，ꏮꅐꏭꈴꏿ。ꃅꈎꃅꆪꑠꑵꑌ，ꃅꆗꌟꃅꆗ，ꃅꊸꁕꃅꁕ，ꇓꂃꌟꃅꂃ，ꐕꇂꉺꍯꈴꃅꈴ。ꑲꇤꅝꉗꍈꀉꄂꌟꃅꐛꑴꌦꇯꆐ，ꆀꃅꇣꄧꏭ，ꋍꈓꋍꃢꋠꃅꅝꌒ，ꉾꃤꀨꆺꒊꌠꇇꁉꊬꄮꑟꇁꌦꀐ；ꋍꈓꋍꃢꉌꃈꑓꌒ，ꎧꏸꎾꃝꒊꌠꈌꂾꄈꄮꑟꇁꌦꀐ——ꆀꃅꈎꏅꀐ。

ꃅꈎꃅꆪꑠꑵꑌ，ꇬꀋꈹꇬꀋꇷꇀꎂꀕꑴꇬ，ꋌꄡꇗꋍꀋꑌꉌꀋꑌꃅ“ꃝ~ꃝ”ꄹꇬꊎꐙꃰꐚꆗꏿꃅꏹꇬꎷ。ꑠꐛꅹꃅꄉ，ꌤꆿꂴꈀꃅꋺꌠꉬꇮꃅ，ꀋꇊꆏꀋꅔꉇꑲꆀꃅꌟꃅꐛꇬꎷ。ꊿꋌꎼꑓꂭꇅꂯꋏꉚꀋꂪꃅ，ꎼꈎꏂꈎꂶꌠꀋꒉꀋꉐꃅꋌꆈꌊꇫꈴꁧꇈ，ꑎꉔꃅꈎꂶꌠꀋꌋꀋꏢꃅꑭꁘꂮꄉꇁꌊꋧꃅꑟꇁꀐꅊꇈ。ꄚ，ꏂꈎꁧꌠꉬꄿꂿ，ꃅꈎꇁꌠꉬꄿꂿ，ꋍꑊꐯꇯꈀꄸꏭꑌꀠꀋꏲꃅꆏꁧꉢꇁꃅ。ꋍꈭꐨꆏ，ꉠꆀꃅꇖꈋꇬꑌ，ꀉꁌꇬꊎꍸꀋꁧꇬꊎꊛꇊꌠ，ꈎꏅꋩꑍꀋꉬꀋꉆꌠꑠꌕꑍꑌ，ꃅꈎꀊꏀꋋꈓꇱꏃꌊꄚꐊꄉꇁꀐꅊꇈ。

“ꈎꏅꃅꌒꆹ，ꌒꌠꌕꑍꇖ；ꄔꊒꃅꌒꆹ，ꌒꌠꌕꑍꇖ；ꑮꑟꃅꌒꑌ，ꌒꌠꌕꑍꇖ；ꈎꏅꃅꌒꆹ，ꆿꇂꍮꒌꆚ；ꈎꎔꆏꆀꃅ，ꆪꎔꆏꈎꏅ……”ꄷꉉꌊꐞꃅꐝꍠꀕ。ꈎꏅꌕꑍꌠꇁꉚꂿꄷꄉ，ꀊꉘꆗꀕꈍꑋꇇꏸꇇꃀꄖꄉ，ꃅꑍꃅꉖꈁꄽꃷꀋꐚ；ꌠꆗꑮꆜꈍꑋꇇꌭꄆꅇꉜꄉ，ꃅꑍꃅꉖꈁꄽꉜꀋꐚ；ꀎꋏꀿꃀꈍꑋꉌꂵꇗꄃꃅꄉ，ꃅꑍꃅꉖꈁꄽꌗꀋꐚ。ꋋꊭꈐꇬꆏ，ꈀꋩꑌꋍꑍꇁꉚꇬꊰꑋꇁꉚꌠꌡ，ꋍꇅꌹꍈꈳꅐꇬꋍꑍꈳꅐꌠꏭꀋꋌ；ꃅꄜꈭꐨꃅꈊꇁꀋꅲ，ꃅꈊꈭꐨꃅꄜꇀꀕꉜ。ꈎꏅꌕꑍꋠꇁꅝꅍꐥ，ꄔꊒꌕꑍꈩꇁꀜꅍꐥ。ꈎꏅꋋꌕꑍꇬ，ꐧꇁꃰꊿꉌꃀꉪꇐꈍꑋꄚꄉꁦꄅꄖꌦꀋꐚ，ꐰꇑꈍꑋꑌꄚꄉꅂꁦꀑꇈꀑꑌꄉꋀꊇꇁꉚꒉꀋꐚ，ꉪꇐꈧꌠꇖꂟꇬꆹꈯꄿꂄꃪꌠ、ꎆꎹꎆꐛꌠ、ꋚꎹꋚꊊꌠ、ꌧꇐꌷꐛꌠ……ꀉꁁꆏ，ꈎꏅꋋꄹꉇꆏ，ꀉꑳꌠꆗꑠꈨꑌ，ꀃꃀꄢꌺꒊꂷꅑꎻꑟ，ꋠꇊꂊꇈꑟꀕꉂ；ꀉꐔꅪꎔꑠꈨꑌ，ꏂꅪꇢꇑꒊꂷꅑꎻꑟ，ꉜꇊꎔꇊꑟꀕꉂ；ꀎꋏꀉꁌꑠꈨꑌ，ꎧꏸꎾꃝꒊꂷꁨꎻꑟ，ꅝꇊꑱꇊꑟꀕꉂ；ꃀꌠꀊꂵꑠꈨꑌ，ꄸꉺꏪꈜꒊꂷꑌꎻꑟ，ꌧꇊꇿꇊꑟꀕꉂ……

ꌟꈄꄓꈭꐨꆧꁨꊁꆹꈄ，ꇮꌺꄓꈭꐨꎸꄂꊁꆹꎔ。ꄈꅿꇗꅉꀊꏀꋅꊂꌕꆪꑓꊏꃰꁦꎵꄮꅐꇁꌠ，ꈨꑭꁕꌟꃅꁊꇁꆀꃅꇖꈋꌸꈭꐨ，ꈬꉙꈬꃪꄚꄉꐭꌷꀕ，ꈯꌩꈯꇓꄚꄉꉘꁇꁉꊂ，ꆀꃅꁡꇤꇬꒉꇁꉏꃚꈧꌠꑌ，ꇬꊎꊛꄓꏿꄉꎓꁨꀕꇰꌥꀐ。ꀿꐰꌺꈩꌒ，ꃀꐮꅪꈩꌒ，ꁍꐮꇖꈩꌒ。ꀋꋦꀋꀀꉈꉩꀕꅍꇫꎍ，ꈜꀕꇈꆀꃅꈎꏅꂶꌠꑌꄚꈿꀋꏅꉈꉩꀕꃅꇫꎍꀐ。

ꈎꆹꈤꊂꈎꏀꅐ，ꆪꆹꈤꊂꆪꏀꑟ。ꀋꉊꂴꇩꏤꑭꊂꏓꂱꅿꌢꎭꀎꇓꂶꌠꅱꈯꀕꃅꇔꇫꎭꇈ，ꊛꄉꑣꋂꄖꄑꍔꊱꑌꊨꊭꉙꁊꌟꃅꁊꌌꃅꇕꄹꊂꑟꊂꆏ，ꆀꃅꆈꌠꌺꇖꉬꇮꃅꌒꐥꌒꂅꏿ，ꋀꆹꇯꍝꃅꆀꇁꉷꃅꏹꃅꌒ、ꏣꎼꑞꈴꀕꃅꌒ、ꇤꍤꇤꄻꏮꃅꌒ、ꈧꌺꇂꃴꌧꇐꌷꃅꌒ、ꆪꌺꇂꃴꉂꅇꄜꃅꌒ……ꀋꉬꀋꉆꌠꆏꇭꍣꄈꑱꁯꇂꃴꄉꋧꃅꇣꄧꋋꂷꆫꃬ，ꈍꐯꈋꉐꏓꂱꉹꁌꃅꇭꍣꄈꊂꈹꄉꐥꌒꈝꃀꍬ，ꊿꋅꌺꇖꑌꇭꍣꄈꐥꌒꇗꅉꇂꃴꄉꌤꃅꆿꃅ，ꈢꈐꈢꉈꇬꄉꎆꎹꋚꈹ。ꋋꆹꇯꍝꃅ“ꈎꌒꆗꊋꑌ，ꐛꌒꐤꊋꑌ”ꄷꌠꉬꀐ。

ꆀꃅꈎꏅꇫꑟꇁꌦꀐ，ꏃꊰꇬꈧꏾ、ꉆꊰꋌꆫꏾꌠꆀꃅꈎꏅꂶꌠꇫꑟꇁꌦꀐ。ꋌꃢꆏ，ꋌꃢꌩꈚꎵꄉꀉꐔꊰꏁꈓꍈꀉꏯ，ꂃꏂꂃꆧꈚꄉꇁꀐ；ꋌꃢꆏ，ꋌꉌꃀꁨꐞꄑꃅꆗꌺꊰꉆꈓꍈꀉꏯ，ꌀꄝꉓꂳꃅꄉꇁꀐ；ꋌꃢꆏ，ꋌꑊꑍꒈꌠꅍꀎꋏꏃꊰꈎꂷꀉꏯ，ꇗꄃꂷꑌꃅꄉꇁꀐ。ꆀꃅꆈꌠꌺꇖꑌꄚꄉꐯꇯꇬꂾꑊꑍꒊꆭꀕ，ꉌꂵꇿꇴꀕꅍꇫꎍꌐꀐ。

ꃅꈎꀉꆹꋋꈓꈢꋒꃄꇱꈭꐨ，ꆀꃅꈎꏅꇫꑟꇁꌦꀐ。ꃅꈎꀉꆹꈢꋒꊂꆏ，ꉘꇉꌠꆏꋌꊂꈭꐨ，ꆀꃅꉷꃅꆅꇵꈺꁘꈧꌠꃅꄚꐊꁧꅊꇈ；ꊿꋅꌺꇖꉌꂵꈐꐒꇁꎭꐪꈧꌠꃅꄚꐊꁧꅊꇈ；ꊨꏦꐥꐨꐥꂮꈐꇬꌤꆿꀋꎵꀋꉅꈧꌠꑌꄚꈿꈢꋒꁧꅊꇈ。ꉈꑴꆏ，ꆀꃅꈎꏅꋋꂷꇫꑟꇁꈭꐨ，ꉘꇉꌠꆏꇩꏤꎆꏣꆿꂷꈧꌠꐚꄑꏿꃅꀻꎆꐞꄿꆹꅊꇈ；ꄈꅿꐥꌒꇗꅉꆹꂷꑭꂸꃉꌟꃅꋍꑍꋍꉙꃅꍻꐙꏿꇁꅊꇈ；ꀋꉬꀋꉆꌠꆏꋍꏅꆀꃅꆈꌠꌺꇖꃅ，ꈁꉉꅇꐛ、ꈁꉪꉌꌸ、ꈁꀠꇐꑌꇁ，ꉌꇿꑓꇿꃅꆀꃅꈎꏅꀊꏀꃅꇫꑟꇁꋋꂷꋨꏦꌦꅊꇈ！